COVID-19 nuk po kursen as punonjësit e Policisë, të cilët ashtu si dhe mjekët janë shumë të ekspozuar si pasojë e punës që ata kanë.
Një ndër ta, është edhe Bibë Dodë Qokaj, oficeri i Policisë Kufitare në Drejtorinë e Durrësit, i cili nuk mundi dot që të fitonte betejën me COVID-19.
Edhe pse ishte dërguar në Turqi për mjekim më të specializuar, gjendja e tij nuk u përmirësua kurrë duke sjellë pasoja fatale për të.
Trupi i tij është sjellë me avion nga Turqi, ku pritet të përcillet në banesën e fundit. Kanë qenë të shumta mesazhet e ngushëllimit që janë shprehur për ndarjen nga jeta e oficerit të policisë.
“Një yll shkeputet sonte nga shtëpia e madhe e fisnike e Pal Mark Elezit të Currajve të Epërm.
Ora 22.00 Rinas. Dhimbje dhe lot, e pabesueshme por e vërtetë, një avion Çarter sjell nga Stambolli trupin e pajetë të oficerit të policisë Kufitare të Drejtorisë së Durrësit Bibë Dodë Qokaj.Kjo sëmundje e pabesë e shekullit u tregua e pamëshirë me djalin tonë 55 vjeçar.
Sa njerëz prite e përcolle në Portin e Durrësit prej 20 vjetësh me buzëqeshjen tënde fisnike e sonte veshe në zi Rinasin e Durrësin. Biri i familjes fisnike tē Pal Mark Elezit të Mirashmarkajve Curraj i Eperm Nikaj – Mertur , nipi i Prek Pal Qokaj “që nuk iu ngri manxerrja në dorë në Zeledinë”.
Eh more Bibë djali veshe Curraj e Nikaj – Mertur e Palq në zi, lot e dhimbje për të ritë tënd e për shpirtin tënd të bardhë e të dlirë. Të qoftë i lehtë dheu vëlla, kumbarë dhe shok i mirë Bibë Dodë Qokaj”, shkruhet në mesazhin e ngushëllimit.
