Kryetarja e Autoritetit të Mediave Audiovizive, Armela Krasniqi, përmes një reagimi në statusin e saj në Facebook ka bërë thirrje që mediat të tregohen të matura dhe të respektojnë ligjin në shpërndarjen dhe transmetimin e fotove, videove amatore ose pamjeve të dhunës që ngjarje të ndryshme të ditës mund të ofrojnë.
Krasniqi thekson se kujdesi për të mos shpërndarë pamje sensitive të ngjarjeve që nxisin dhunë apo që ekspozojnë viktimat e tyre, nuk është vetëm një detyrim ligjor, por edhe një mënyrë që garanton shikueshmëri, audiencë dhe ndjekës më të shumtë në numër për çdo media.
Lexo edhe:
“Është e rëndësishme që Media të tregojë maturi në shpërndarjen dhe transmetimin e fotove, videove amatore ose pamjeve të dhunës që ngjarje të ndryshme të ditës mund të ofrojnë. Është në respekt të dinjitetit të të ekspozuarve, të ndjeshmërisë së të afërmve të tyre, por edhe të gjithë opinionit publik, siç edhe në respekt të ligjit, që të bëhet evitimi i transmetimit të pamjeve të dhunës ekstreme.
Ligji “Për mediat audiovizive në Republikën e Shqipërisë” është i qartë kur shprehet në nenin 4 të tij për “moslejimin e transmetimeve që nxisin intolerancën ndërmjet shtetasve”, (pika 2/d), si dhe “moslejimin e transmetimeve që nxisin ose justifikojnë dhunën”, (pika 2/dh).
Kodi i Transmetimit saktëson specifikisht në Seksionin 3 të tij se “Media duhet të tregojë maturi me fotot, videot amatore ose pamjet e katastrofave, aksidenteve ose dhunës, duke respektuar dinjitetin e të ekspozuarve dhe ndjeshmërinë e të afërmve”.
Përpos kësaj, resptektimi i Etikës dhe profesionalizmit në çdo raportim apo transmetim audioviziv, dhe jo vetëm, veç sa garanton shikueshmëri, audiencë dhe ndjekës më të shumtë në numër për çdo media.”, shprehet Krasniqi.
