Këngët që qarkullojnë në Youtube, të cilat kanë si interpretuese në skenë artisten e mirënjohur Parashqevi Simaku mund të kenë gjeneruar në total deri në 1 milion euro.
Drejtori i Acromax Media, Aldor Nini në një intervistë për Vip Magazine, dhënë për gazetarin Gurjan Doçi, deklaroi se ka shumë palë të treta që kanë hedhur në Youtube materialet që ka kënduar artistja duke gjeneruar deri më tani deri në 100 milion klikime.
Sipas Ninit, të gjitha të drejtat e këngëve të Simakut, i takojnë RTSH-së, që është edhe entiteti i vetëm që mund t’i publikojë zyrtarisht këto materiale artistike.
Lexo edhe:
“Youtube paguan për atë që prodhon videon dhe atë që prodhon audion. Këngëtarja në fjalë si interpretuese, të ardhurat duhet t’ i marrë nga agjensitë kolektive. Nga Youtube ajo nuk mund të marrë asnjë të ardhur. Ka palë të treta që nuk kanë të drejta që e kanë marrë këngën dhe e kanë hedhur në Youtube. Të gjitha të drejtat e këngëve janë të RTSH-së. Ai është entiteti që mund t’ i publikojë zyrtarisht. Pasi është pronar i pjesës vizuale dhe të audios. Janë disa këngë që janë hedhur. Ka video deri në 700 mijë klikime. Në total mund të jenë 100 milion klikime. Mund të jenë bërë diku te gjysmë milion deri në 1 milion euro me këngët e saj në total, që janë hedhur nga palë të treta”, deklaroi Aldor Nini.
Nini u ndal edhe te rasti i Pirro Çakos, i cili u komentua shumë në rrjet pasi bllokoi disa nga kanalet që kishin publikuar këngën e Parashqevi Simakut me titullin “E duam lumturinë”, për ta publikuar në platformën e tij në Youtube. Ai sqaron se edhe në këtë rast të drejtat e autorit i takojnë RTSH-së, e cila më pas mund të shpërndajë të gjitha të ardhurat te komponentët që kanë kontribuar për prodhimin e këtij materiali muzikor.
“Pirro Çako ka marrë mundimin si kompozitori i një nga këngëve që të heqë disa nga videot për ta hedhur në kanalin e vet. Por duke pasur parasysh që Pirro si kompozitor, as ai nuk e ka të drejtën e videos. Të ardhurat që gjenerohen nga këngë duhet t’ i shkojnë RTSH-së”, deklaroi Nini./Vip-Magazine/
