Një ngjarje e rëndë ka ndodhur në provincën e Viterbos në Itali, ku një 44-vjeçar polak ka vrarë të birin e tij e 10-vjeçar, që kishte nga martesa me një grua shqiptare.
I ati i viktimës, kreu aktin e rëndë në banesën e ish-bashkëshortes, ku Mattias jetonte vetëm me nënën e tij pasi gjykata italiane kishte vendosur që 44-vjeçari mos t’i afrohej banesës.
Mirko Tonko, një roje sigurie në një spital të zonës, e ekzekutoi të birin duke i prerë fytin me thikë. Ai arriti të futej në banesë, pak pasi një i afërm i 10-vjeçarit e la atë aty pasi e mori nga shkolla.
Lexo edhe:
“Ne e pamë atë mëngjesin e sotëm jashtë shkollës, duke shkuar përpara e mbrapa si në ekstazë. Por fëmija nuk ishte me të”, kanë deklaruar personat që e panë 44-vjeçarin në dalje të shkollës së të birit.
Polaku dhe shqiptarja 32-vjeçare Mariola Rapaj, i kishin dhënë fund martesës, pas denoncimeve që 32-vjeçarja kishte bërë në polici. Sipas mediave italiane, shkaku ishte dhuna sistematike që 44-vjeçari kishte ushtruar ndaj shqiptares.
Fëmija u gjet i pajetë dhe i mbuluar me gjak në kuzhinë nga e ëma. Ndërkohë që babai vrasës po rrinte në dhomën tjetër. Ai u arrestua më pas nga policia.
Lidhur me ngjarjen reagoi dhe kryebashkiaku i Vetrallës, Sandrino Aquilani, i cili, në faqen e Komunës në FB, shpreh ngushëllimet e tij: “Me dhimbje të thellë mësojmë lajmin për vrasjen e një bashkëqytetari tonë të vogël. Mattias ishte vetëm 10 vjeç dhe vdiq në mënyrë të pashpjegueshme. Një histori që na lë të habitur dhe të tronditur dhe që në këtë moment, duke pritur që drejtësia tokësore të marrë rrugën e saj, duhet të na çojë drejt reflektimit, meditimit dhe lutjes”.
