Ashtu sikurse është shprehur gjithmonë, Dojna Mema e ka nisur karrierën e saj televizive në Top Media, që prej moshës 19 vjeçe. Duke nisur nga Top Albania Radio e më pas si moderatore në Top Channel, Dojna është një ndër figurat që ka qendruar për një kohë shumë të gjatë pjesë e Top Medias.
Mirëpo, me nisjen e sezonit të ri, u mësua se moderatorja ishte larguar nga Top Channel. Ashtu siç vetë Dojna është shprehur, rrugëtimit të saj në atë televizion i kishte ardhur fundi. Largimi i saj ka qenë miqësor, pa asnjë hatërmbetje apo polemikë. Ndërkohë, fansat kanë qenë tejet kuriozë se ku do e rishihnin moderatoren pas mbylljes së “Pop Culture”, shkruan Descript.al.
Burime bëjnë me dije se Dojna do të nisë një program të ri së shpejti, në ekranin e ABC News. Nuk dihen ende detaje rreth tipologjisë së këtij programi, të cilin besojmë do e zbulojmë në momentin që moderatorja do e konfirmojë publikisht këtë lajm. Ndërkohë Dojna ka filluar të jetë më aktive në Youtube, duke postuar videot aq të dashura për fansat e saj, ku trajton tema të ndryshme me gjyshen.
